„О сите вие, кои сте жедни, дојдете при водите; ако и немате сребреници, дојдете, купете и јадете. Да, дојдете, купете вино и млеко, без сребреници и без плаќање!“ (Исаија 55,1)
Дали Исус е вистинит? Дали навистина мисли сè што вели? Одговорете решително: Да, секој збор. Тогаш, ако го утврдите тоа, со вера побарајте го секое ветување што Тој го дал и примете го благословот, зашто ова прифаќање со вера ѝ дава живот на душата. Можете да верувате дека Исус е верен кон вас, дури и ако се чувствувате како најслабото и најнедостојното од Неговите деца. И кога верувате, сите ваши темни, тешки сомнежи се враќаат назад врз лукавиот измамник кој ги предизвикал… Со жива вера треба да Му верувате, дури и кога во вас силно се раѓа поривот да изговорите зборови на недоверба. (Testimonies to Ministers, p. 517)
Освежителната вода, што извира во сува и пуста земја, помага пустината да процути и им дава живот на оние што се соочени со смрт. Тоа е симбол на Божјата милост што може да ја даде само Христос, а која како жива вода ја чисти, ја освежува и ја засилува душата. Оној, во кого живее Христос, носи во себе непресушен извор на милост и сила. Христос го радува животот и им ја осветлува животната патека на сите што навистина го бараат. Неговата љубов, примена во срцето донесува добри дела за вечен живот. И таа не само што ја благословува душата во која влегува, туку како жива река се излева низ зборовите и праведните постапки освежувајќи ги сите жедни околу себе. (Патријарси и пророци, стр. 412. оригинал)
Како што телото постојано прима хранливи материи што го одржуваат животот и силата, така и душата мора постојано да биде во заедништво со Христа, да Му се предава и целосно да зависи од Него. (Мисли од гората на блаженствата, стр. 19. оригинал)