„Господовиот Закон е совршен – ја крепи душата; Господовото сведоштво е верно – му дава мудрост на неукиот; Господовите повелби се праведни – го веселат срцето; Господовата заповед е светла – ги просветлува очите.“ (Псалм 19,7.8)
Бидејќи Господовиот Закон е совршен и според тоа непроменлив, грешните луѓе не можат сами по себе да ги задоволат мерилата на неговите барања. Затоа Исус дошол како наш Откупител. Негова мисија е да им овозможи на луѓето да станат учесници во божествената природа и така да ги доведе во согласност со начелата на небесниот Закон. Кога се откажуваме од своите гревови и го примаме Христа како свој личен Спасител, тогаш го воздигнуваме Законот. Апостол Павле прашува: „А дали го укинуваме Законот преку верата? Никако, туку уште посилно го утврдуваме“ (Римјаните 3,31). (Мисли од гората на блаженствата, стр. 49. оригинал)
Бог бара од секој Свој следбеник ништо помалку од тоа во својот личен живот да му го открива на светот Христовиот карактер и со своите зборови и пример да сведочи дека Христос не страдал и умрел залудно, туку дека преку Неговата откупителна благодат во нив повторно се обновува Божјиот лик. (Testimonies to Ministers, p. 438)
Бог ги повикува оние што тврдат дека се определени да ја објавуваат вистината на светот, насекаде – и на високи и на ниски положби, во јавниот живот и во скриените патеки на приватниот живот – да покажат дека се во заедница со Бога; дека христијанството извршило благородно дело во нивниот живот и дека се посвети и посреќни од оние што не ја признаваат својата верност кон Божјите заповеди. (Testimonies to Ministers, p. 438)
