„Ќе ви дадам ново срце, и ќе вдахнам нов дух во вас! Ќе го извадам каменото срце од вашето тело и ќе ви дадам срце од месо.“ (Езекиел 36,26)
Вистините на Божјото слово не се само обични мислења, туку изјави на Севишниот. Тие што овие вистини ќе ги направат составен дел од својот живот, во секој поглед стануваат нови созданија. Ним не им се даваат нови умствени способности, но темнината што преку незнаењето и гревот го помрачувала нивното разбирање, се отстранува.
Зборовите: „Ќе ви дадам ново срце“ значат: „Ќе ви дадам нови мисли.“ Оваа промена на срцето секогаш е проследена со јасно сфаќање на христијанските должности и разбирање на вистината. Јасноста на нашето согледување на вистината ќе биде во склад со нашето разбирање на Божјото слово. Оној што внимателно и со молитва му пристапува на Светото Писмо, ќе стекне јасно разбирање и здраво расудување, како да достигнал повисок степен на интелигенција, вртејќи се кон Бога.
Ако умот е посветен на задачата на проучување на Библијата, разбирањето ќе се зголеми, а способноста за расудување ќе се подобри. Проучувањето на Писмото го развива умот и го прави поурамнотежен отколку кога се занимава со собирање информации од книги што немаат никаква врска со Библијата. (Counsels to Teachers, p. 172.173)
Кога Божјиот Дух ќе го освои срцето, Тој го преобразува и животот. Грешните мисли се отфрлаат, лошите дела се напуштаат; местото на гневот, зависта и кавгите го заземаат љубов, понизност и мир. Местото на жалоста ја зазема радост и лицето свети со небесна светлина. Никој не ја гледа раката што го зема товарот ниту ја забележува светлината што слегува од небесните дворови. Благослов доаѓа тогаш кога душата со вера му се покорува на Бога. (Копнежот на вековите, стр. 172.173. оригинал)
