„Да го чуеме завршниот збор за сè: ‘Бој се од Бога, исполнувај ги Неговите заповеди, зашто во тоа е сè за човекот.’“ (Проповедник 12,13)
Во Библијата е претставена сета должност на човекот. Соломон вели: „Бој се од Бога, исполнувај ги Неговите заповеди, зашто во тоа е сè за човекот.“ Божјата волја е откриена во Неговата пишана Реч, а тоа претставува основно знаење. Човечката мудрост и познавањето на јазиците на различни народи може да помогне во мисионската работа. Разбирањето на обичаите на луѓето, местото и времето на случување на одредени настани е практично знаење, бидејќи помага во разјаснувањето на библиските ликови и во прикажувањето на силата на Христовото учење, но не е неопходно да се знаат овие подробности. Патникот може да го најде патот наменет за откупените и нема да има никакво оправдување за оние што ќе загинат затоа што не го разбираат Светото писмо.
Во Библијата секој важен принцип е откриен, секоја должност разјаснета, секоја обврска јасна. Целата човечка должност Спасителот ја сумирал во следните зборови: „Љуби Го Господа, твојот Бог, со сето свое срце, и со сета своја душа, и со сета своја мисла… Љуби го твојот ближен како себеси“ (Матеј 22,37.39). Планот на спасение е јасно опишан во Речта. Дарот на вечниот живот е ветен под услов човекот да негува спасоносна вера во Христа. Привлечната сила на Светиот Дух е истакната како важен фактор во делото на нашето спасение. Наградата што им е ветена на верните и казната одредена на грешниците се јасно наведени. Библијата ја содржи науката за спасението за сите оние што ќе ги слушнат и ќе ги извршуваат Христовите зборови.
Апостолот вели: „Целото Писмо е од Бога вдахновено и е полезно за поука, за изобличување, за поправање и за воспитување во правдата, за да биде Божјиот човек совршено подготвен за секое добро дело.“ (2. Тимотеј 3,16.17). Библијата самата себе се толкува. Еден текст ќе се покаже како клуч што отклучува други текстови, а со тоа светлината го осветлува скриеното значење на Речта. Со споредување на различни текстови кои се занимаваат со иста тематика, согледувајќи го нивниот однос од секоја страна, вистинското значење на Светото писмо ќе стане очигледно…
Господ Бог, Создателот на сета вселена, му го дал евангелието на светот по бесконечна цена. (Fundamentals of Christian Education, str. 186-188)
