„А од управителите натаму се бара секој да се покаже верен.“ (1. Коринтјаните 4,2)
Оние кои се верни управители со Господовите средства, треба да знаат точно како стојат нивните работи и како мудри луѓе да бидат подготвени за непредвидени случаи. Доколку времето на милост за нив ненадејно заврши, тие нема да остават низа тешкотии на оние кои ќе го наследат нивниот имот.
Многумина воопшто не мислат да се погрижат за своето наследство додека сѐ уште ги служи добро здравје. Но нашите браќа мораат да преземат соодветни мерки. Тие треба да ја познаваат својата материјална состојба и да не дозволат нивните работи да се заплеткаат. Тие се должни прашањето за својот имот да го уредат така што ќе можат во секое време да го остават.
Тестаментот треба да се направи така што ќе биде законски исправен. Откако ќе се потпише, таквиот тестамент може со години да ја зачува својата валидност и нема да има никава опасност да ја загуби валидноста ако се наложи да се направат некакви дополненија во врска со него. Браќа, смртта нема да дојде еден ден порано само затоа што сте го направиле својот тестамент. Делејќи го со тестамент својот имот на роднините, не заборавајте го Божјето дело. Вие сте Негово орудие, управители на Неговиот имот и затоа Неговите барања треба да добијат прво место. Се разбира, вашата сопруга и децата не треба да останат без ништо; ако се во сиромаштија, треба да се погрижите за нив. Во својот тестамент не внесувајте долга листа на имиња на свои роднини кои не се во сиромаштво, само затоа што тоа е вообичаено.
Никој нека не мисли дека ќе ја стекне Христовата мудрост ако за време на својот живот натрупува богатство, а потоа, пред да умре, да направи тестамент дел од тоа богатство да се искористи за некоја добротворна цел.
Некои во текот на својот живот себично ги задржуваат своите средства верувајќи дека ќе го поправат своето занемарување ако во тестаментот се сетат за Божјето дело. Но ниту половина од тоа што е одвоено не се користи за она што е наменето. Браќа и сестри, вложувајте сами во небесната ризница и не препуштајте ја својата управителска служба на друг.
Родителите треба да се плашат да им ги доверат на своите деца материјалните богатства што им ги дал Бог, доколку немаат сигурен доказ дека нивните деца покажуваат поголем интерес, љубов и посветеност кон Божјето дело од самите нив. Треба да бидат сигурни дека децата ќе бидат посериозни и поревносни во унапредување на Божјето дело и подарежливи за различните начини на кои ќе се употребат тие средства. (Темели на среќниот дом, стр. 396-398. оригинал)
