„Затоа, возљубени, додека го очекувате ова, погрижете се Тој да ве најде чисти и непорочни во мир.“ (2. Петрово 3,14)
Господ сака делото на објавување на тројната ангелска вест да се извршува со сѐ поголем успех. И како што во сите времиња делувал на својот народ да му овозможи извојување на победа, така и во наше време за победоносно остварување на намерите што ги има со својата Црква. Тој ги повикува своите свети еднодушно да тргнат напред, да одат од сила во уште поголема сила, од вера во уште поголема сигурност и доверба и во вистинитоста и праведноста на Неговото дело.
Ние треба цврсти како карпа да стоиме покрај начелата на Божјото слово, имајќи на ум дека Бог е со нас и дека ќе ни даде сила да се соочиме со секое ново искуство. Да ги одржиме начелата на праведност во својот живот, за да можеме во името Господово да напредуваме од сила во сила. Ние треба да ја сметаме за многу света верата која Божјиот Дух ја поткрепувал со совети и со свое одобрување од нашите први денови па сѐ до сега. Нам треба да ни биде многу драгоцено она дело кое Господ го објавува преку својот послушен народ кој ги држи заповедите и кој со помош на Неговата благодат ќе станува сѐ посилен и сѐ поуспешен како што времето ќе минува. Непријателот се труди да ја помрачи способноста за расудување на Божјиот народ, да го ослаби неговиот успех; но, ако неговите припадници работат онака како што ќе ги упатува Божјиот Дух, Тој ќе ги отвора вратите пред нив и ќе им даде можност да ги изградат урнатините. Тие ќе стекнуваат искуство на постојан раст, сѐ додека Господ не се спушти од Небото со голема слава и сила за да го стави својот печат на конечната победа на челата на своите верни.
Работата којашто нѐ чека ќе бара вложување на сите сили на човечкото битие. Ќе биде потребна силна вера и постојана будност. Понекогаш тешкотиите со кои ќе се соочуваме ќе бидат многу обесхрабрувачки. Ќе бидеме прелашени од големината на задачата. Сепак, со Божја помош, Неговите слуги ќе извојуваат конечна победа. (Selected Messages, vol. 2, str. 407.408)
Бев длабоко потресена од глетката која од неодамна ја видов во ноќно видение. Ми изгледаше како некое големо движење – дело на пробудување – да напредуваше во многу места. Нашите верници заминуваа да работат, отповикувајќи се на Божјиот повик. (Selected Messages, vol. 2, str. 402)
