„И еден од старешините одговори, велејќи ми: ‘Кои се и од каде дојдоа овие, кои се облечени во бели облеки?’“ (Откровение 7,13)
Божјиот народ грешеше во многу нешта. Сатаната многу добро знае на кои гревови успеал да го наведе Божјиот народ и истите ги прикажува во најсилна светлина преувеличувајќи ја нивната тежина, зборувајќи: „Зар Бог ќе ме избрка од себеси мене и моите ангели, а ќе ги награди оние кои правеа исти гревови? Ако си праведен Господи, ти не можеш да го направиш тоа. Твојот суд и твојот престол нема да бидат праведни! Правдата бара тие да бидат осудени.“
Меѓутоа, иако грешеле, Христовите следбеници не се предале на силата на злото. Тие ги отфрлиле своите гревови и во понизност го побарале Господа и божествениот Бранител посредува во нивна корист. Тој што најмногу е навредуван заради нивната неблагодарност, кој ги познава нивните гревови и нивното каење, кажува: „Господ да те укори сатано. Јас го дадов Својот живот за овие души. Тие се врежани на Моите дланки“…
И додека Божјиот народ ги мачи своите души пред Бога, молејќи се за чистотата на срцето, ќе биде издадена заповедта: „Соблечете ја од него извалканата облека“, и ќе бидат изговорени зборови полни со охрабрување: „Ете, ја отфрлив од тебе вината твоја и те облекувам во свечена облека“ (Захарија 3,4). Во тие чисти облеки на Христовата правда ќе се облечат искушаните и испитани, но верни Божји деца. Презрениот остаток ќе биде облечен во величествен костум, кој никогаш повеќе нема да го извалкаат со расипаноста на овој свет. Нивните имиња се запишани во книгата на животот на Јагнето, запишани меѓу имињата на верните од сите времиња. Тие се бореле против лукавството на сатаната, и не се одрекле од својата вера заради рикањата на змевот. Сега засекогаш се спасени од сите лукавства на сатаната. Нивните гревови се префрлени на зачетникот на гревот.
Остатокот нема само да добие простување и да биде примен, туку ќе биде и почествуван. На нивните глави ќе бидат ставени „чисти капи“. Тие ќе бидат како цареви и свештеници на Бога. Додека сатаната ги изнесувал своите обвинувања и се трудел да ги уништи, невидливите ангели биле околу нив и на нив го ставале белегот на живиот Бог. Тоа се оние кои пред Јагнето стојат на гората Сион и го имаат името на Неговиот Татко напишано на нивните чела. Тие ќе пејат нова песна пред престолот, песна која не може никој да ја научи освен сто четириесет и четирите илјади кои се откупени од Земјата. (Testimonies for the Church, vol. 5, str. 474-476)
