„Затоа човекот ќе ги остави татка си и мајка си, и ќе се прилепи кон својата жена; и тие ќе станат едно тело.“ (Битие 2,24)
Околу секое семејство постои свет круг кој треба да се сочува. Никој нема право да го повреди овој свет круг. Сопругот и сопругата треба да бидат сѐ еден на друг. Жената не треба да има тајни за кои нејзиниот маж не знае а таа ги споделува со другите; мажот, исто така, не треба да има тајни коишто ги крие од својата жена а им ги открива на други. Срцето на неговата жена мора да биде гроб во кој се закопани сите маани на нејзиниот маж, а срцето на мажот – гроб што ги крие сите слабости на неговата жена. Никогаш едната страна не треба да прави шеги со чувствата на другата страна. Никогаш, ниту на шега ниту на кој било друг начин, мажот или жената не треба пред другите да се пожалат од својот брачен другар бидејќи таквата неразумна и навидум невина шега, кога често се повторува, може да заврши со непријатности или оттуѓување. Ми беше покажано дека околу секое семејство мора да постои света ограда.
Семејниот круг мора да се смета за свето место, претслика на небото, огледало во кое се одразува нашиот лик. Можеме да имаме пријатели и познаници, но тие не треба да се мешаат во нашиот семеен живот. Во семејството мора да владее чувство на цврсто заедништво што ќе обезбеди атмосфера на мир, спокојство и доверба.
Членовите на семејниот круг треба да се молат Бог да го освети нивниот јазик, нивните уши и нивните очи, како и секој дел од нивното тело. Кога ќе се соочат со злото, тоа не мора да ги надвладее. Христос овозможил нашиот карактер да биде мирис за добро…
Колкумина само го срамотат Христа и погрешно го претставуваат Неговиот карактер во семејниот круг! Колку има такви на кои им недостасува трпение, истрајност, проштавање и вистинска љубов! Мнозина нешто сакаат или не сакаат и сметаат дека имаат право да го искажат своето лошо расположение наместо да ја откриваат Христовата волја, Неговите дела и Неговиот карактер. Исусовиот живот е исполнет со добрина и љубов. Дали растеме во Неговата божествена природа?
Татковците и мајките свечено нека му ветат на Бога, како оние кои велат дека го слушаат и сакаат, дека со Негова милост, никогаш нема да дозволат меѓу нив да се појави несогласување, туку дека со својот живот и карактер ќе покажат ист таков дух каков што сакаат да имаат и нивните деца. (Темели на среќниот дом, стр. 177.178. оригинал)
