„Зашто каде е вашето сокровиште, таму ќе биде и вашето срце.“ (Лука 12,34)
О колку пари се потрошени за некорисни предмети во куќата, за тантели и раскошни фустани, за слатки и сѐ друго што не ни е неопходно! Родители, учете ги своите деца дека не е исправно да се трошат Божјите пари за лични уживања… Поттикнете ги да го зачуваат секој денар, секогаш кога тоа е можно, за да го употребат во евангелското дело. Практикувајќи самоконтрола, тие ќе стекнат богато искуство. Таквите поуки ќе ги заштитат од стекнување навики на неумереност.
Децата можат да научат да ја покажат својата љубов кон Христа кога се откажуваат од непотребните ситници, за кои трошат многу пари. Ова треба да се направи во секое семејство. За тоа се потребни тактика и методи, но тоа ќе биде најдоброто воспитување што можат да го добијат децата. Кога сите мали деца би ги принеле своите дарови на Господа, нивните дарови би биле слични на поточиња кои, соединети, стануваат голема река.
Поставете мала кутија на полица или на некое безбедно но видно место, во која децата ќе можат да ги ставаат своите дарови за Господа… Така тие можат да се воспитуваат за Бога.
Не само што Господ го смета десетокот за свој туку и ни кажува како да го одделиме за Него. Тој вели: „Почитувај го Господа со својот имот и со првините на сиот свој приход.“ Тука не се вели дека треба нашите средства да ги потрошиме за себе, а остатокот да го даваме на Господа, иако десетокот е веќе одвоен. Да го одвоиме прво она што е Божје. Упатството што Светиот Дух ни го дал преку апостол Павле за нашите дарови, претставува начело кое се однесува и на десетокот: „во секој прв ден од седмицата секој од вас да оддели и остави кај себе колку што може“ (1. Коринтјаните 16,2). Ова ги опфаќа и родителите и децата…
Најдоброто наследство што можат родителите да им го дадат на своите деца е познавањето на корисната работа и примерот од животот обележан со несебична добродетел. Со таков живот тие ја покажуваат вистинската вредност на парите, ценејќи ги само по доброто кое го постигнуваат за задоволување на нивните потреби и потребите на другите, како и за напредок на Божјeто дело. (Темели на среќниот дом, стр. 388-390. оригинал)
