„Тука е трпението на светите, кои ги пазат Божјите заповеди и верата во Исуса.“ (Откровение 14,12)
Бог води народ надвор од овој свет на возвишената платформа на вечната вистина, Божјите заповеди и Исусовата вера. Тој сака да ги дисциплинира припадниците на својот народ и да ги направи достојни за нивното име. Тие нема да бидат во неслога, верувајќи еден во друг, а други во нешто сосем спротивно, потполно независно од организираната црква. Преку различните дарови и служби кои Тој ги поставил во црквата тие ќе дојдат во единство на верата. Ако некој поединец го истакнува своето лично мислење за библиската вистина без оглед на мислењето на своите браќа и својот став го оправдува со тврдењето дека има право на свои посебни сфаќања и погледи, а потоа упорно настојува тоа да им го наметне на другите, како тогаш може да се исполни Христовата молитва? И ако потоа се подигне некој друг, па уште некој, тврдејќи дека секој има право да верува и да го зборува она што смета дека е правилно, без оглед на верата на црквата, каде е тогаш хармонијата помеѓу Христа и Неговиот Татко која Христос толку ја истакнува во молитвата за своите ученици?
Бог води и утврдува народ на цврстата платформа на верата, Божјите заповеди и Исусовото сведоштво. Тој му дал на својот народ прав синџир на јасно и складно поврзани библиски вистини. Овие вистини се од небесно потекло и биле истражувани како сокриено богатство кое било ископано преку внимателно пребарување на Светите Списи и со многу молитви…
Во својата љубов и нежно сочувство, Бог никогаш не бил понаклонет кон своите земски деца отколку што е сега. Никогаш не постоело време кога Тој бил поподготвен да направи нешто повеќе за својот народ отколку што прави токму сега. И Тој е подготвен да упатува, води и да ги спаси сите оние кои ќе се согласат да бидат спасени на начинот кој Тој го одредил. Оние кои се духовни, во состојба се и духовно да расудуваат и тие секаде и во сè гледаат докази за Божјото присуство и за Неговото постојано залагање за своето дело. Сатаната со своето лукавство ги повлекол нашите прародители од Едемската градина, така што од нивната невиност и чистота ги вовлекол во грев и неискажана несреќа. Тој не се согласил да ја уништува верата. Сите сили кои може да ги доведе под своја контрола, тој и во овие последни денови вешто ги користи во своето дело на уништување…
Но за да можеш да биде спасен, мораш да го земеш Христовиот јарем, а да го отфрлиш јаремот на сопствените навики. Победата која Христос ја извојувал во пустината на искушението за тебе претставува гаранција за победата која и ти можеш да ја извојуваш во Негово име. Твојата единствена надеж и спасение се наоѓа во тоа да победиш на ист начин како што победил Христос. (Testimonies for the Church, vol. 3, str. 446.447,455-457)
