„Туку според Светецот, Кој ве повика, бидете и самите свети во целото свое држење.“ (1. Петрово 1,15)
Вистината, каква што е во Исуса, има големо влијание врз оној што ја прима, и не само врз него, туку и врз сите оние со кои тој доаѓа во контакт. Вистински обратената душа прима светлина одозгора, а Христос во таа душа е: „Извор на вода што тече во вечен живот“ (Јован 4,14). Луѓето можат лажно да ги прикажуваат и толкуваат зборовите, побудите и делата на таквата душа, но таа нема тоа да го става на ум, затоа што знае дека се работи за значајни нешта. Таа не гледа на сегашноста, не копнее за слава и не се грижи дали луѓето ќе ја фалат. Нејзината надеж е на небото; и таа оди право, со очи насочени кон Исуса. Ја застапува правдата затоа што тоа е исправно и затоа што само оние што творат правда ќе влезат во Божјото царство. Таа е блага и кротка и сака да ги усреќи другите. Никогаш не зборува: „Зар јас сум чувар на брат ми“ (Битие 4,9), туку го сака својот ближен како себе самиот. Не е груба и наклонета да го наметнува своето мислење на другите како непобожните луѓе, туку со небесна светлина им свети и на другите. Таа е искрен, храбар војник на Христовиот крст што ја проповеда речта на Животот. Доколку таа душа стекне углед кај луѓето, ќе исчезнат предрасудите кон неа, ќе се признае нејзината побожност и нејзините библиски начела ќе бидат уважени.
Таков е секој оној што ќе се обрати вистински. Тој носи драгоцена вистина и правејќи така оди како што одел Исус, зборува како Тој што зборувал и работи како Тој што работел; и Исусовата вистина делува преку него во домот, меѓу соседите и во црквата. Тој на луѓето им дава пример за драгоценоста на начелата на вистината, покажувајќи како делува вистината на животот и карактерот на оној што вистински верува во неа. Тој и не знаејќи ја исполнува својата задача во големото Христово дело за откупување на душите – дело кое е далекусежно според својот карактер и дејство, поткопувајќи ги на тој начин лажните вери и лажните науки…
Господ сака ти и членовите на твоето семејство да бидете христијани во секол смисол на тој збор и со својот карактер да ја покажете посветувачката моќ на вистината. Вашите дела ќе ја издржат пробата на судот само ако стекнете таков карактер. Кога огнот во последниот ден би се запалил над вашите сегашни дела, тие би изгореле како сено и слама. Немојте да мислите дека ова е претерана строгост, ова е вистина. Во сите ваши дела до израз доаѓа вашето „јас“. Ќе сакате ли да се прилагодите на возвишените мерила? (Testimonies for the Church, vol. 5, str. 569.570)
