„Затоа, свети браќа, вие кои учествувате во небесното призвание, насочете ги вашите мисли кон Исуса, Апостолот и Првосвештеникот на нашето исповедување.“ (Евреите 3,1)
Нашиот распнат Господ се застапува за нас пред Отецот крај престолот на благодатта. Ние можеме да се повикуваме на Неговата жртва помирница за да добиеме прошка, оправдување и посветување. Закланото Јагне е нашата единствена надеж. Нашата вера гледа кон Него, Го прифаќа како Оној кој може да даде целосно спасение, и мирисот на таа седоволна жртва е прифатен пред Отецот. На Христа му е дадена сета сила на небото и земјата и сѐ е можно за оној кој верува. Христос во Својата слава е заинтересиран за нашиот успех. Тој е длабоко заинтересиран за целото човештво. Тој е наш Спасител, полн со сочувство…
Да имаме на ум дека нашиот голем Поглавар свештенички моли пред престолот на милоста за својот откупен народ. Тој живее довека и може да посредува за нас. „Дечиња мои, ова ви го пишувам за да не згрешите; и ако некој згреши, имаме Бранител при Таткото: Исуса Христа, Праведникот“ (1. Јованово 2,1)
Исусовата крв моќно и успешно посредува за оние кои отпаднале, за оние кои се бунтовни, за оние кои грешат наспроти големата светлина и љубов. Сатаната ни стои од десната страна за да нѐ обвинува, но нашиот Застапник стои од десната страна на Таткото да посредува за нас. Тој никогаш не изгубил ниту еден случај кој Му бил доверен. Ние можеме да се потпреме на својот Застапник; бидејќи Тој своите заслуги ни ги засметува на нас. Послушајте ја Неговата молитва што ја упатува пред да биде предаден и осуден. Послушајте ја Неговата молитва за нас; бидејќи Тој нѐ има во своето сеќавање.
Тој нема да ја заборави својата Црква во светот на искушенијата. Тој го гледа својот искушан и напатен народ и се моли за нив… Да, Тој гледа на својот народ во овој свет, свет во кого владее прогонство, кој е одбележан и извалкан со клетва и Тој знае дека им се потребни сите божествени извори на Неговото сочувство и љубов. Нашиот Претходник заради нас влегол зад завесата, а сепак со златен синџир на љубовта и вистината е поврзан со својот народ преку најинтимни чувства и сочувство.
Тој посредува за најслабите, најугнетените и најнапатените, за душите кои се изложени на најголеми неволји и искушенија. Тој се моли за нас со подигнати раце: „Ете, те врезав во Своите дланки, твоите ѕидови секогаш Ми се пред очите“ (Исаија 49,16). Бог сака да ги слушне сесрдните молитви на својот Син и да одговара на нив. (Seventh-day adventist Bible Commentary, vol. 7, str. 948)
