„Според тоа, ние сме пратеници на Христа – на тој начин што Бог моли преку нас. Молиме во името на Христа: помирете се со Бога!“ (2. Коринтјаните 5,20)
Дел од писмото упатено до сестрата близначка на Елен Вајт, Елизабет Бенгз: Зарем не веруваш во Исуса, Лизи? Зарем не веруваш дека Тој е твој Спасител – дека ја покажал својата љубов кон тебе давајќи го својот драгоцен живот за да би можела да бидеш спасена? Сѐ што се бара од тебе е да Го прифатиш Исуса како свој драгоцен Спасител. Најискрено се молам Господ Исус да ти се открие на тебе и на Рубен (сопругот на Лиза). Твојот живот на овој свет не е исполнет со задоволство туку со болка; и доколку не се сомневаш во Исуса, и веруваш дека умрел за да те спаси, ако дојдеш кај Него таква каква што си, ако му се предадеш себе на Исуса и ги прифатиш Неговите ветувања со жива вера, Тој ќе ти биде сѐ што ќе посакаш.
Секому кој прашува: „Што треба да правам за да се спасам?“ му велам: „Верувај во Господа Исуса Христа. Ниту за миг не се сомневај во Неговата желба да те спаси.“ На Евреите Тој им вели: „Но вие не сакате да дојдете при Мене, за да имате живот.“ (Јован 5,40). Не дозволувај ова да се однесува и на Рубен и на тебе и на помошникот во вашиот дом. Исус сака да ве спаси, да ви подари мир, одмор и сиурност во овој живот и на крајот вечен живот во Неговото царство. Никој нема да биде приморан да биде спасен. Господ Исус не присилува ничија волја. Тој на сите им вели: „Тогаш денес изберете кому ќе му служите“ (Исус Навин 24,15). Умот и срцето кои му се посветени на Исуса ќе пронајдат одмор во Неговата љубов…
Затоа ти, моја драга сестро, Рубен и вашиот прислужник, имате причина да се надевате на Неговата милост, да верувате во Исуса Христа дека може да ве спаси. А зошто? Дали затоа што сте без вина? Не; затоа што сте грешници, Исус вели: „Не дојдов да ги повикам праведните, туку грешниците на покајание“ (Лука 5,32). Кога ѓаволот ви шепка дека нема надеж, кажете му дека има. „Зашто Бог толку го возљуби светот, што Го даде Својот Единороден Син, та секој, кој верува во Него, да не загине, туку да има вечен живот“ (Јован 3,16). Колку повеќе може да направи Бог за тебе, повеќе од она што веќе го направил, со цел да те наведе да Го засакаш? Лизи, верувај, едноставно верувај дека Исус го мисли токму она и што го вели. Фати се за Неговото слово и потпри ја својата беспомошна душа на Исуса Христа.
Рацете кои биле за тебе приковани на крстот се пружаат кон тебе да те спасат… Дали ќе покажеш вера и доверба во Исуса? Копнеам да те земам во прегратки и да те ставам на градите на Исуса Христа.
Мораш да Го прифатиш Исуса. Тој копнее да ти подари мир и светлост од своето лице. Лизи, моето срце сака да види дека се надеваш во Исуса, бидејќи Тој со својата благодат може да ти овозможи да ги поднесеш сите свои страдања. Тој те сака. Тој сака да те спаси. (Letter 61, 1891)
