„Кој победува, ќе се облече така во бели облеки и нема да го избришам неговото име од книгата на животот, но ќе го признаам неговото име пред Мојот Татко и пред Неговите ангели.“ (Откровение 3,5)
Секој од нас може да увиди дека постои сила која делува заедно со нашите напори со цел да извојуваме победа. Зарем мажите и жените нема цврсто да се држат за помошта која им е обезбедена, за да бидат издигнати и облагородени? Зошто се понижуваат себе со попуштање на изопачениот апетит? Зошто не се развиваат во Исусовата сила и не победуваат во Негово име? Исус ќе ја слушне и најслабата молитва што ќе ја упатиме. Тој има сожалување кон слабостите на секоја душа. Секој може да прими помош од Него кој може да спаси. Ве упатувам на Исуса Христа, Спасителот на грешниците, кој единствено може да ви даде сила да победите во секој миг.
Небото за нас има огромна вредност. Ние не смееме да ризикуваме да го изгубиме. Не смееме да се впуштаме во тој опасен потфат. Мораме да знаеме дека со нашите чекори треба да управува Господ. Нека Бог ни помогне да бидеме успешни во ова големо дело. Тој подготвил круни за победниците. Тој има бели облеки за праведните. Подготвил вечен свет на славата за оние кои ја бараат небесната слава и го сакаат вечниот живот. Секој кој ќе влезе во Божјиот град ќе влезе како победник. Тој нема да влезе како осуден престапник, туку како Божји син. Секој кој ќе влезе ќе биде дочекан со добредојде со следниве зборови: „Дојдете, благословени од Мојот Татко, и примете го во наследство Царството, кое ви е приготвено од создавањето на светот!“ (Матеј 25,34)
Со задоволство ќе изговорам зборови кои ќе им помогнат на таквите потресени души да цврсто се држат со вера во моќниот Помошник, за да можат да развијат карактер кој Бог со задоволство ќе го гледа. Небото може да им упати повик и да им ги понуди своите најодбрани благослови и можат да ја имаат секоја можност да развијат совршен карактер; но сѐ ќе биде залудно доколку не се спремни да си помогнат самите на себе. Тие можат да ја вложат својата од Бога дадена сила или ќе тонат сѐ пониско и ќе бидат онеспособени за добро и сега и во вечноста.
Сите кои се слаби и унижени со попуштање на гревот можат да станат Божји деца. Во нивна моќ е постојано да им прават добро на другите, да им помогнат да ги надминат искушенијата; и правејќи така, тие ќе пожнеат добро за себе. Тие ќе бидат блескаво и јасно видело во светот, а на крајот, од усните на Царот на славата ќе слушнат благослов: „Добро, сакан и верен слуго!“ (Матеј 25,23). (Christian Temperance and Bible Hygiene, str. 148.149)
