„Одвратни му се на Господа нечесните во срцето, а непорочните во патот му се благоугодни.“ (Пословици 11,20)
Тој, кој живее во небесното Светилиште, суди праведно. Тој повеќе ужива во својот народ, кој се бори со искушенијата во овој грешен свет, отколку во четите ангели што го опкружуваат неговиот престол.
Целата небесна вселена е заинтересирана за оваа трошичка наш свет, зашто Христос платил бесконечна цена за животот на нејзините жители. Со помош на невидливи посетители Откупителот на светот земјата ја поврзал со небото зашто на неа живеат откупениците Господови. Небесните суштества и сега ја посетуваат земјата како и во деновите кога шетале и разговарале со Аврама и со Мојсеја. Среде деловната бучава во нашите големи градови, среде мноштвото што се тиска на нашите улици и пазаришта, во кои од утро до вечер луѓето се однесуваат така како работите, спортовите и уживањата да се единственото нешто што постои во овој живот, во кои малку има такви кои размислуваат за невидливите стварности дури и на тие места Небото има свои набљудувачи и свои свети луѓе. Постојат невидливи сили кои следат секој збор и секое дело на човечките суштества. На секој деловен собир, на секоја забава, на секое богослужение, има повеќе слушатели отколку што може да се види со човечко око. Понекогаш небесните сили ја подигаат завесата што го крие невидливиот свет, така што нашите мисли можат да се одвратат од трката и динамиката на животот и да се позанимаваат со фактот дека постојат невидливи сведоци за сѐ што правиме или ќе кажеме.
Би требало многу подобро да ја сфатиме мисијата на тие небесни известувачи. Би било добро да земеме предвид дека во сета наша работа можеме да сметаме на соработка и грижа од небесните суштества. Кротките и понизните, кои веруваат во Божјите ветувања и се потпираат врз нив, ги придружуваат невидливите војски на светлината и силата. Херувими и серафими, и ангели кои се силни десет илјади по десет илјади и илјада илјади стојат од Божјата десна страна. „Тие се послужнички духови испратени да им служат на оние што ќе наследат спасение“ (Евреите 1,14).
Овие ангели весници водат верен извештај за зборовите и делата на синовите човечки. Секое свирепо и неправедно дело против Божјите деца, сѐ што морале да претрпат од оние кои правеле зло, сѐ е забележано на небото. (Христови параболи, стр 176.177. оригинал)
