„Возљубени мои, не чудете се на огненото испитување, што се појави меѓу вас, за да ве искуша, како да ви се случува нешто необично.“ (1. Петрово 4,12)
Неопходно е во ова време на проба еден со друг да се храбриме и тешиме. Сатанските искушенија денес се поголеми отколку било кога порано затоа што тој знае дека има уште многу малку време и дека наскоро секој случај ќе биде одлучен за живот или смрт. Денеска не е време да им подлегнеме на обесхрабрувањата и потешкотиите, туку со потполна доверба во Семоќниот Јаковов Бог да истраеме во секоја неволја. Господ ми покажа дека Неговата благодат е доволна да нѐ одржи во сите наши потешкотии; и покрај тоа што тие се поголеми од порано, сепак доколку целосно се потпреме на Бога ќе можеме да го совладаме секое искушение и благодарение на Неговата благодат ќе извојуваме победа.
Доколку ги пребродиме сите неволји и се здобиеме со победа над сатанските искушенија, тогаш сме го издржале испитувањето на нашата вера, која е многу повредна од злато и сме станале посилни и поподготвени да се соочиме со она што ни претстои. Но ако тонеме и попуштаме под сатанските искушенија, сѐ повеќе ќе слабееме, ќе ја изгубиме наградата која што следува за поднесеното испитување и нема да бидеме добро подготвени за следното. На тој начин ќе стануваме сѐ послаби и послаби, сѐ додека сатаната потполно не нѐ зароби и потчини на својата волја.
Мораме да го имаме на себеси сето оружје Божјо и да бидеме подготвени во секој момент за судир со силите на темнината. Кога искушенијата и испитувањата ќе навалат врз нас, да му се обратиме на Господа и да се бориме со Него во молитва. Тој нема да нѐ отпушти празни туку ќе ни подари благодат и сила да ја победиме и скршиме силата на непријателот. О, кога секој би можел да ги види овие нешта во нивната вистинска светлина, и да издржи потешкотија како добар војник Исусов! Тогаш Израел би зачекорил напред, силен во Бога и во силата на Неговата моќ.
Бог ми покажа дека Тој на Својот народ му даде горчлива чаша да пие, за да ги прочисти и исчисти. Тоа е горчлив пијалак и тие можат да го направат уште погорчлив ако мрморат, се жалат и негодуваат. Оние кои на овој начин ќе ја примат, мораат да добијат уште една затоа што првата не го имала саканото дејство врз срцето. Ако ни втората не делува, ќе следи трета, четврта, сѐ додека не се постигне саканиот резултат; во спротивно, тие ќе останат погани, нечисти во срцето. Видов дека оваа горчлива чаша може да биде ублажена со трпение, истрајност и молитва, и дека таа успешно ќе делува врз срцата на оние кои така ја примаат и дека Бог со тоа ќе биде прославен. (Рани списи, стр. 46.47. оригинал)
