„И видов кога од устата на змевот и од устата на ѕверот и од устата на лажниот пророк излегоа три нечисти духа, како жаби; зашто тоа се ѓаволски духови кои прават чуда; тие одат кај царевите на целиот свет, за да ги соберат за војна во оној голем ден на Бог Седржителот.“ (Откровение 16,13.14)
Јас видов дека светиите мораат да имат целосно познавање на сегашната вистина, којашто тие ќе бидат обврзани да ја бранат со Светото Писмо. Тие мора да ја разбираат состојбата на мртвите; затоа што духовите на умрените ќе им се појавуваат, претставувајќи се како нивните сакани роднини или пријатели, кои ќе им изнесуваат небиблиски учења. Тие ќе чинат сѐ што е во нивна сила да побудат наклонетост и ќе чинат чуда пред нив за да го потврдат она што го објавуваат. Народот Божји мора да биде подготвен да им одолее на тие духови со библиската вистина дека мртвите не знаат ништо, и дека оние кои така се појавуваат се духови демонски.
Ние мораме добро да го испитаме темелот на нашата надеж; затоа што ќе мораме за тоа да дадеме причина од Писмото. Оваа измама ќе се шири и ние ќе мораме да и се спротивставуваме лице во лице; и доколку не сме подготвени за тоа, ќе западнеме во стапица и ќе бидеме победени. Но доколку од наша страна го чиниме сето она што можеме за да бидеме подготвени за судирот кој е пред нас, Бог ќе го стори своето и Неговата семоќна рака ќе нѐ заштити. Тој попрво би го испратил секој ангел од славата на небото да ги оградат верните, отколку да дозволи тие да бидат измамени и заведени од лажните чуда на сатаната.
Јас ја видов брзината со која оваа измама се ширеше. Ми беше покажан еден воз кој се движеше со светлосна брзина. Ангелот ме повика да гледам повнимателно. Јас ги фиксирав своите очи кон возот. Изгледаше како целиот свет да е внатре. Тогаш тој ми го покажа машиновозачот, кој беше убава, отмена личност, кон која сите патници се угледуваа и му оддаваа длабока почит. Јас бев збунета и го прашав мојот ангел придружник кој е тоа. Тој рече: „Тоа е сатаната. Тој е управителот во облик на ангел на светлината. Тој го има поробено светот. Тие себеси се имаат предадено на силни измами и да веруваат лаги и мора да бидат осудени. Оној, кој по рангот доаѓа веднаш по него, машиновозачот и останатите негови застапници распоредени по различни служби, зависно од тоа кој како може да го употреби, сите заедно со брзина на молскавица одат кон погибел.“
Јас го запрашав ангелот дали баш некој не е исклучок. Тој ме повика да погледнам кон спротивната страна и јас видов малечка група како патува на тесна патека. Изгледаше како вистината сите меѓусебно да ги поврзала. (Рани списи, стр. 262.263)
