„Ете, колку е добро и колку е мило кога браќата живеат заедно.“ (Псалм 133,1)
Дали очекуваме дека ќе се сретнеме со своите браќа на небото? Ако овде можеме да живееме со нив во мир и љубов, тогаш и таму ќе можеме. Но како ќе живееме со нив на небото кога овде постојано се караме и судираме?…
Нашите тврди срца мора да се разбијат. Потребно е меѓусебно да се зближиме во совршена слога, имајќи на ум дека сме откупени со крвта на Исуса од Назарет. Секој нека си каже себеси: „Тој го дал Својот живот за Мене и Тој сака во овој живот да ја откријам љубовта која Тој ја покажал давајќи се Себеси за Мене“. Христос „нашите гревови сам ги изнел на Своето тело на дрво“, за Бог да може да остане праведен, а сепак да ги оправда тие што веруваат во Него. Сите што ќе се предадат на Христа ги очекува живот, вечен живот.
Залагајте се за единство. Молете се и тежнејте за него. Тоа ќе ви донесе духовно здравје, возвишеност на мислите, благородност на карактерот, наклонетост кон она што е небесно; ќе ве оспособи да ја совладате себичноста и злите претпоставки и да станете повеќе отколку победници, преку Оној кој Ве љуби и кој се жртвувал заради вас. Распнете го своето јас, почитувајте ги другите повеќе отколку самите себе. Така ќе станете едно со Христа. Пред небесната вселена, пред црквата и пред светот, вие ќе дадете несоборливи докази дека сте Божји синови и ќерки. Со својот пример вие ќе го славите Бога.
Делувањето на чудесната сила која ги спојува срцата на Божјиот народ во христијанска љубов треба да го увидат оние кои не се во верата. Тие треба да увидат дека Господовиот народ престојува на небото во Христа. Зар нема со својот живот да дадете докази за тоа што може да направи Божјата вистина за сите кои го љубат и кои Му служат? На Бога му е познато што вие можете да станете. Тој знае што може Неговата благодат да направи за вас ако сакате да станете соучесници во божествената природа…
Единството е сила, неслогата е слабост. Ако тие што ја исповедаат сегашната вистина бидат сложни, тие ќе имаат успешно влијание. Сатаната многу добро го знае ова. Тој никогаш не бил порешителен од денес да го намали дејството на Божјата вистина со сеење на раздори и неслога во Божјиот народ. (Counsels for the Church, str. 290.291)
Каков е постот што е по Негова волја? – се поставува прашање до оние што сакаат да Му се приближат на Бога. – „Да го поделиш својот леб со гладните, да ги воведеш под својот покрив бескуќниците.“ (Исаија 58:6.7; Библија)
Што е чиста и вистинска вера? Според Христовите зборови, чиста и вистинска вера е покажување на милост, сочувство и љубов во семејството, во црквата и во светот.
Ние сме должни да им укажуваме внимание на оние на коишто им е потребна нашата љубов, нашата нежност и грижа. Секогаш да имаме на ум дека сме Христови претставници, и дека благословите со кои Тој нѐ обдарил треба да ги делиме, не со оние што би можеле да ни возвратат, туку со оние кои со тоа ќе ги задоволат своите овоземски и духовни потреби и кои тоа ќе знаат да го ценат. Оние кои повикуваат на гости за да им помогнат на таквите кои во животот имаат малку радост, за да внесат некој зрак светлина во нивниот мрачен живот и за да им го ублажат нивното чувство на сиромаштија и потиштеност, постапуваат несебично и во склад со Христовите упатства.
Насекаде околу себе можеме да видиме сиромашни и страдалници. Многу семејства оскудеваат во исхрана, малите се желни за леб. Во куќите на сиромашните нема соодветен намештај, а често ниту постела. Мнозина живеат во вистински колиби, лишени од најнеопходните потреби. Извиците на сиромашните се воздигаат до небото. Бог сето тоа го гледа и слуша.
Делото на собирање на сиромашните претставува задача со која уште многу одамна требаше да се зафати секоја група на оние кои веруваат во вистината за наше време. Задоволувајќи ги потребите на неволните, хранејќи ги гладните и воведувајќи ги сиромашните и прогонетите во својата куќа, примајќи од Бога секој ден милост и сила за да допреме до сите длабочини на човековата беда и да им помогнеме на оние кои навистина не се во состојба самите на себе да си помогнат, ние го вршиме делото на милостивиот Самарјанин. Вршејќи го ова дело, ние имаме извонредна прилика на сите такви да им укажеме на Христа како на распнат Спасител.
