„Како магла ги растерав твоите престапи и како облак твоите гревови. Обрати Ми се Мене, зашто Јас те искупив.“ (Исаија 44,22)
Срцето на Бескрајната Љубов копнее по оние кои чувствуваат дека немаат сила сами да се ослободат од сатанските стапици; Тој милосливо им нуди поткрепа за да живеат за Него… Дали и ти, читателу, го избра сопствениот пат? Дали си се оддалечил од Бога? Дали си се обидел да се храниш со плодовите на престапот, за на крајот да согледаш дека се претвораат во пепел на твоите усни? И сега, кога животните планови ти се уништени и надежите мртви, седиш ли осамен и очаен? Оној ист глас, кој одамна му зборува на твоето срце, но кој не си сакал да го слушнеш, ти се обраќа сега јасно и гласно: „Станете и одете! Ова не е ваше одморалиште, зашто се онечистивте, тоа ќе ве уништи“… Не го слушај непријателот кога те советува да не му пријдеш на Христа сѐ додека не се поправиш, додека не станеш доволно добар за да дојдеш кај Бога! Ако толку чекаш, никогаш нема да дојдеш! (Пророци и цареви, стр. 316-320. оригинал)
Небесниот план на спасение е доволно опсежен за да го опфати целиот свет. Бог копнее исцрпеното човештво да го вдахне со животен дух. И Тој нема да дозволи ниту една душа, која искрено тежнее за нешто повозвишено и поблагородно од она што светот може да го пружи, да остане разочарана. Бог постојано им ги испраќа своите ангели на оние кои, иако се наоѓаат во мошне неповолни ситуации, упатуваат молитви со вера стремејќи се да се потчинат на возвишената сила која ќе им донесе спасение и мир. Бог ќе им се открие на разни начини и со своето провидение ќе ја засили нивната доверба во Оној кој се жртвувал за да ги откупи сите. (Пророци и цареви, стр. 377.378. оригинал)
