„Дечиња мои, да не љубиме со зборови или само со јазикот, туку во дело и вистина.“ (1. Јованово 3,18)
Делата на љубовта имаат чудесна моќ, затоа што се божествени. Кога би ја сфатиле поуката дека „кроткиот одговор гневот го ублажува“, дека „љубовта долго трпи, полна е со добрина“, дека „љубовта покрива многу гревови“ – каква исцелителна сила би добил нашиот живот!“ (Пословици 15,1; 1. Коринтјаните 13,4; 1. Петрово 4,8). Колку само животот би бил преобразен, а земјата би станала претслика на Небото, кое уште сега би можело да се види и да се почувствува! Овие скапоцени поуки можат да се изнесуваат толку едноставно што ќе можат да ги разберат дури и малите деца. Детското срце е нежно и на него може лесно да се влијае; и кога ние, кои сме постари, ќе станеме како „мали деца“ (Матеј 18,3), кога ќе се поучиме од едноставноста, благоста и нежната љубов на Спасителот, тогаш нема да ни биде тешко да се приближиме до срцата на малечките и да ги поучуваме за исцелителната служба на љубовта.
Во очите на овој свет парите се моќ, но од христијанска гледна точка љубовта е моќ. Интелектуалната и духовната сила потекнуваат од ова начело. Чистата љубов има моќ да прави добро и ништо друго освен добро. Таа го спречува несогласувањето и сите зла кои произлегуваат од тоа и ни носи најголема среќа. Богатството често расипува и уништува, грубата сила ранува, но вистината и добрината се обележје на чистата љубов.
Домот треба да биде центар на најчистите и највозвишени чувства. Мирот, согласувањето, љубовта и среќата треба секој ден истрајно да се негуваат, додека овие вредности не ги освојат срцата на членовите на семејството. Билката на љубовта треба грижливо да се негува, инаку ќе овене. Ако сакаме да живее во нашето срце, секое добро начело треба да се негува. Она што сатаната го сади во срцето, мора да се искорне: завист, љубомора, сомнеж, клеветење, нетрпеливост, предрасуди, себичност, алчност и разгаленост. Ако дозволиме ова зло да остане во душата, тоа ќе донесе род којшто ќе расипе мнозина. Колкумина се оние кои ги негуваат овие отровни билки, кои ги уништуваат скапоцените плодови на љубовта и ја валкаат душата…
Во многу семејства постои голем недостаток од изразување на меѓусебна љубов. Иако не е потребна претерана чувствителност, сепак неопходно е љубовта и нежноста да се искажуваат на убав, чист и достоинствен начин. (Темели на среќниот дом, стр. 195.196.198. оригинал)
