„Но во случај да се подзабавам, да знаеш како да се однесуваш во Божјиот Дом, кој е црква на живиот Бог, столб и потпора на вистината.“ (1. Тимотеј 3,15)
Црквата е Божје орудие за спасение на луѓето. Таа е организирана да служи и нејзина задача е да му го објави евангелието на светот. Божја намера уште од почеток е светот со помош на црквата да го спознае совршенството на Неговата добрина, милост и моќ. Верниците на црквата, што ги повикал Тој од темнината „кон своето чудесно видело“, мора да ја одразуваат Неговата слава. Црквата е ризница на богатството на Христовата благодат; преку неа Божјата љубов конечно ќе им се открие дури и на „началствата и на властите на небесата“ (Ефесјаните 3,10).
За црквата во Библијата се запишани многубројни и возвишени ветувања. „Мојот дом ќе се вика молитвен дом за сите народи“ (Исаија 56,7). „Ќе ги направам благослов нив и сите околу Мојот Рид и ќе им дадам дожд на време, и тоа ќе биде дожд на благослов“ (Езекиел 34,26)…
Црквата е Божја тврдина, Божји град-прибежиште во овој вознемирен свет. Секоја изневера од страна на црквата претставува предавство кон Оној кој го откупил човештвото со крвта на својот единороден Син. Уште од почеток Божјата црква на земјата ја сочинувале верни и на Бога предани луѓе. Во секое време Господ имал свои будни стражари кои верно му сведочеле на поколението во кое живееле на земјата. Тие стражари на светот му објавувале пораки со опомени, а кога би биле повикани да го положат своето оружје, други го продолжувале делото. Бог со тие сведоци стапил во заветен однос, соединувајќи ја црквата на земјата со црквата на небото. Тој праќал ангели од небото да ѝ служат на Неговата црква, и силите на темнината, кои во Библијата се нарекуваат „пеколна врата“, не можеле да го совладаат Неговиот народ.
Бог ја одржал својата црква низ вековите на прогонство, борба и мрак. Ниту еден облак не паднал на неа, а Тој да не бил подготвен за тоа; ниту една противречна сила не му се спротивставила на Неговото дело, а Тој да не го предвидел тоа однапред. Сѐ се одиграло онака како однапред што претскажал Тој. Бог не ја заборавил својата црква, туку со пророчки зборови го објаснил она што ќе се случи и се случило токму тоа што го кажале пророците вдахновени со неговиот Дух. Сите Негови намери се обистиниле. Божјиот закон е поврзан со Неговиот престол и никаква сила на злото не може да го уништи. Вдахновената вистина ја чува лично Бог и таа ќе триумфира над сето она што ѝ се спротивставува. (Делата на апостолите, стр. 9-12. оригинал)
