„Вкусете и видете колку е добар Господ: блажен е човекот, кој се надева на Него!“ (Псалм 34,8)
Така младите со вера ќе го запознаат Бога преку знаење добиено врз основа на искуства. Тие самите ќе се уверат во вистината на Неговите зборови, во вистината на Неговите ветувања. Ќе испитаат и ќе видат дека Господ е добар. Саканиот Јован имал сознание добиено со сопствено искуство… Така секој поединец може со лично искуство да потврди „дека Бог е вистинит“ (Јован 3,33). Тој може да сведочи дека сам ја видел, ја слушнал и ја почувствувал Христовата сила. Врз основа на личното искуство тој може да каже:„Помошта ми беше потребна и ја најдов во Исус. Сите мои потреби беа задоволени, задоволена е гладта на мојата душа; за мене Библијата е откровение на Христа. Верувам во Исус затоа што Тој ми е божествен Спасител. Верувам во Библијата бидејќи увидов дека таа е Божјиот глас којшто ѝ зборува на мојата душа.“
Ние сме во можност да се воздигаме сè повеќе и повеќе во запознавањето на Божјиот карактер. Кога Мојсеј во молитва побарал: „Покажи ми ја Својата слава“ (Излез 33,18), Господ не го укорил, туку ја услишил неговата молитва. Бог му рекол на Својот слуга: „Ќе дозволам пред тебе да помине сета Моја добрина, и пред тебе ќе го објавам името Јехова“ (Излез 33,19). Гревот го замрачува нашиот ум и ја замаглува нашата свест. Ако ги очистиме своите срца од гревот, светлината на познавање на Божјата слава во лицето на Исус Христос, која свети од Неговите зборови и одблеснува од лицето на природата, сè повеќе и сè поцелосно ќе го објавува Оној кој е „милостив, долготрпелив на гнев, многумилостив и вистински“ (Излез 34,6). Во Неговата светлина ние ќе видиме светлина, сè додека нашиот ум, срце и душа не се преобразат во облик на Неговата светост. (Сведоштва за црквата, стр. 321.322. оригинал)
