„За да нема раздори во телото, но деловите подеднакво да се грижат едни за други.“ (1. Коринтјаните 12,25)
Единството е сила, неслогата е слабост. Ако тие што ја исповедаат сегашната вистина бидат сложни, тие ќе имаат успешно влијание. Сатаната многу добро го знае ова. Тој никогаш не бил порешителен од денес да го намали дејството на Божјата вистина со сеење на раздори и неслога во Божјиот народ.
Светот и популарните цркви се против нас, а и законите на земјата исто така наскоро ќе бидат против нас. Ако некогаш имало време кога Божјиот народ требало да биде сложен, тогаш тоа е денес. Бог ни објавил вистина посебна за ова време за да му ја објавиме на светот. Сега се шири последната вест на милост. Ние работиме со мажи и жени кои наскоро ќе мораат да се појават на Божјиот суд. Затоа особено мораме да се трудиме со секој збор и со секое дело да одиме по нашиот Пример, за со својот пример да ги доведеме луѓето кај Христа. Мораме да внимаваме како им ја изнесуваме вистината на другите за тие, согледувајќи ја нејзината убавина и едноставност, да можат да ја примат. Ако нашите карактери бидат сведоци за нејзината посветувачка сила, ќе бидеме постојана светлина на другите, живи посланија кои секој може да ги разбере и да ги прочита. Ние не смееме да му дадеме место на сатаната дозволувајќи меѓу нас да се појави раздор и неслога.
Во својата последна молитва пред распнувањето, нашиот Спасител се молел меѓу Неговите ученици да владее единство. Подготвувајќи се за страдањата на крстот, Тој не се молел за Себе, туку за оние кои ќе ги остави по Себе, да го продолжат Неговото дело на земјата. Нив ги очекувале најтешки искушенија, но Исус знаел дека најголема опасност им се заканува од духот на огорченост и неслога…
Сите што ги примиле благодетите со залагање на Божјите слуги треба според своите способности да се соединат со нив во работата за спасување на душите. Тоа е задача на сите вистински верници, проповедниците и народот. Тие секогаш треба да ја имаат оваа голема цел пред себе, трудејќи се секој да ја изврши својата специфична задача во црквата, а сите работејќи во ред, слога и љубов…
Божјите слуги треба сесрдно, ревно и предано да го шират сознанието за вистината на блиску и далеку, но при тоа не смеат да заборават да работат за зацврстување на единството во црквата. Тие мораат внимателно да бдеат за да не се појави неслога и раздор. (Testimonies for the Church, vol. 5, str. 236.238)
