„Стравот од Господа е почеток на мудроста и познавањето на Светиот е разум.“ (Пословици 9,10)
Како и нашиот Спасител, и ние сме на овој свет да извршуваме служба за Бога. Сите ние треба да станеме како Бога во карактерот и животот посветен на служба за откривање на Бога во светот. За да бидеме Божји соработници, за да бидеме како Него и да го откриваме Неговиот карактер, ние мораме вистински да Го познаваме. Мораме да Го познаваме онака, како што Тој се открива.
Познавањето на Бога е основа на секое вистинско обучување и секоја вистинска служба. Тоа е единствениот сигурен штит против искушенијата. Единствено тоа може да нè направи како Него во карактерот.
Тоа е знаење што им е потребно на сите што работат за издигнување на своите ближни. Преобразувањето на карактерот, чистотата на животот, успехот во службата, верноста на вистинските принципи, сето тоа зависи од вистинското познавање на Бога. Ова познавање е најдобрата подготовка за овој и за животот што доаѓа…
Природните нешта, кои сега ги гледаме, ни даваат само нејасна слика за Неговата слава. Гревот ја расипал убавината на Земјата; на сите нешта можат да се видат траги од злото. Сепак, останале многу убавини. Природата ни сведочи дека Оној со бескрајна моќ, голема добрина, милост и љубов ја создал Земјата и ја исполнил со живот и убавина. Дури и во оваа нарушена состојба, сите нешта ја откриваат работата на рацете од Големиот Уметник. Каде и да се свртиме, можеме да го слушнеме Божјиот глас и да видиме докази за Неговата добрина.
Од свечениот татнеж на силните громови и постојаното фучење на древниот океан, до убавите песни со кои одекнуваат шумите, десетиците илјади гласови на природата зборуваат за Неговата слава. На земјата, на небото и во морето, со своите чудесни бои и нијанси што варираат од величествен контраст до нежна хармонија, ние ја гледаме Неговата слава. Вечните ридови ни зборуваат за Неговата моќ. Дрвјата што ги веат своите зелени знамиња под сончевата светлина и световите во својата нежна убавина, укажуваат на својот Создател. Животворното зеленило што ја покрива кафената земја, зборува за Божјата грижа и за најскромните Негови созданија. Морските пештери и земните длабочини ги откриваат Неговите богатства… Сета светлина и убавина што ја красат земјата и ги осветлуваат небесата, зборуваат за Бога. (Здравје и среќа, стр. 409.411.412. оригинал)
