„И Јаков им рече на сите во својот дом и на сите што беа со него: ‘Отфрлете ги туѓите идоли, што се наоѓаат во ваша средина; очистете се и преоблечете се.’“ (Битие 35,2)
Религијата во семејството се состои во подигање на децата во Господовата наука и богобојазливост. Секој член на семејството треба да биде воспитан со Христовите поуки, секоја душа треба будно да внимава сатаната да не го излаже и оттргне од Христа. Ова е целта која треба да ја постигне секое семејство и во тоа не смеат да потклекнат ниту да се обесхрабрат. Кога родителите се грижливи и внимателни во давањето упатства и настојуваат своите деца да ги воспитаат во Божја слава, тие соработуваат со Бога, а Бог соработува со нив во спасување на душите на децата за кои умрел Христос.
Верското воспитување подразбира многу повеќе отколку обичното образование. Тоа значи да се молите со своите деца, учејќи ги како да се приближат кон Христа и да му ги кажат сите свои потреби. Тоа значи дека во својот живот морате да покажете дека Исус ви е сѐ, дека Неговата љубов ве прави трпеливи, љубезни, кротки, а сепак решителни во тоа да им заповедате на своите деца, како што правел Аврам.
Вашето однесување во домот се бележи во небесните книги. Оној кој сака да биде свето суштество на небото, мора да стане свето суштество во своето семејство. Ако татковците и мајките се вистински христијани во своето семејство, тие ќе бидат корисни верници во црквата и ќе бидат во состојба да ги водат работите во црквата и во општеството онака како што ги водат во своето семејство. Родители, не дозволувајте вашата вера да биде празно исповедање, туку жива реалност…
Темелот на напредокот на црквата се поставува во домот. Влијанијата кои се покажуваат во семејниот живот се пренесуваат и на црковниот живот; поради тоа најпрво во домот треба да се почне со извршување на црковните должности.
Каква вера развиваме во домот, таква ќе имаме и во црквата. Направете го домот тврдина. Посветете го своето семејство на Бога и тогаш зборувајте и постапувајте во домот како христијани. Бидете љубезни, трпеливи и кротки, свесни дека сте учители. (Темели на среќниот дом, стр. 317-319. оригинал)
