„Блажени се кои гладуваат и жедуваат за правда, зашто тие ќе се наситат!“ (Матеј 5,6)
Праведноста е светост, сличност со Бога, а „Бог е љубов“ (1. Јованово 4,16). Таа е усогласеност со Божјиот закон, „зашто сите Твои заповеди се праведни“ (Псалм 119,172), а љубовта е „исполнување на Законот“ (Римјаните 13,10). Праведноста е љубов, а љубовта е светлина и Божји живот. Божјата праведност е отелотворена во Христа. Примајќи го Него, ја примаме и праведноста.
Праведноста не се стекнува со мачни напори ниту со заморна работа, со дарови или жртви, туку таа претставува доброволен дар на секоја душа која е гладна и жедна за правда. „Вие што жеднувате, дојдете сите при водите; дури и вие, кои немате пари, дојдете, купувајте и јадете… без пари и без плаќање“. „Нивната победа е од мене, вели Господ“, и: „Името со кое ќе го именуваат е: Господ – Нашата правда“ (Исаија 55,1; 54,17; Еремија 23,6).
Никаква човечка сила не може да ја задоволи гладта и жедта на душата. Но Исус кажува: „Ете, стојам пред вратата и чукам. Ако некој го чуе гласот мој и ја отвори вратата, ќе влезам кај него и ќе вечерам со него, и тој со мене“ (Откровение 3,20)…
Како што ни е потребна храна за да ја одржиме физичката сила, така ни е потребен Христос, Лебот од Небото, да нѐ поткрепи во духовниот живот и да ни подари сила за работа во Божјето дело. Како што телото постојано прима хранливи состојки што го одржуваат животот и снагата, така и душата мора да одржува постојана заедница со Христа, покорувајќи му се и целосно потпирајќи се на Него…
Кога ќе го запознаеме карактерот на Спасителот, ние ќе посакаме потполно да се преобразиме и да се обновиме според примерот на Неговата непорочност. Колку повеќе го запознаваме Бога, толку повозвишен ќе биде нашиот идеал за карактерот и посесрдна нашата желба да го одразуваме Божјиот лик. Кога душата копнее по Бога, божественото се соединува со човечкото, а срцето полно со копнеж тогаш кажува: „А ти, душо моја, само на Бога чекај, зашто само во Него е мојата надеж“ (Псалм 62,5).
Ако сте свесни за сиромаштијата на својата душа, ако сте гладни и жедни за праведност, тоа е доказ дека Христос ја поттикнал желбата во вашето срце да Го повикате. (Мисли од Гората на блаженствата, стр. 18.19. оригинал)
