„Даниел одлучи во срцето дека нема да се оскверни со царските јадења и со виното од неговиот стол, па го замоли дворскиот старешина да го поштеди та да не се оскверни.“ (Даниел 1,8)
Родители, запрашајте се себеси едно сериозно прашање: „Дали ги воспитавме нашите деца да се потчинуваат на родителскиот авторитет, и така ги обучивме да му бидат послушни на Бога, а Неговиот закон да го сметаат за најврховен водич за однесување во животот? Дали ги воспитавме да бидат мисионери за Христа? Да одат и чинат добро?“ Верни родители, вашите деца ќе треба да војуваат решителни битки за Господа во денот на судирот; и додека се здобиваат со победи за Принцот на мирот, тие ќе се здобиваат со победи за себеси. Но доколку тие не одраснале во Господовиот страв; доколку тие немаат знаење за Христа, немаат врска со небото, тие нема да имаат морална сила, тие ќе се потчинат на земните моќници кои се воздигнале себеси над небесниот Бог во воспоставувањето на лажниот ден за одмор на место Саботата на Јехова. Подготовките се веќе во тек и движења се развиваат, што пак ќе доведе до создавање на иконата на ѕверот. Случувањата во овоземската историја така ќе се одиграат што ќе се исполнат претскажувањата на пророците за овие последни денови.
Од луѓето ќе се бара да донесат одлука; отпадниците или ќе се вратат на својата верност на Бога или ќе стапат во редовите на непријателот: сатаната ќе управува со сите кои на крајот ќе одбијат да бидат водени според Божјиот закон. Тој ќе ги вдахне родителите да се борат против своите деца, а децата да се борат против родителите – да ги предаваат членовите од својот дом на непријателите. Случувањата кои претстојат фрлаат сенка на нашиот пат. Татковци, мајки, сесрдно ве молам сериозно да им се посветите на децата. Секојдневно упатувајте им верски поуки. Учете ги да Го сакаат Бога и да бидат верни на исправните начела. Работете, работете сега со возвишена и искрена вера, која е подложна на божественото влијание на Светиот Дух. Не испуштајте ниту еден ден, ниту еден час. Поучувајте ги своите деца дека срцето мора да биде научено на самоконтрола и самооткажување. Животните цели мораат да бидат усогласени со Божјиот закон. Никогаш не помирувајте се со фактот вашите деца да растат без Христа. Немојте да бидете мирни кога се ладни и рамнодушни. Вапете кон Бога и дење и ноќе. Молете се и работете на спасение на душите на своите деца. (Review and Herald, 23. april 1889)
