„Очистилиштето стави го на Ковчегот, а во Ковчегот положи ги плочите на Сведоштвото што ќе ти ги дадам.“ (Излез 25,21)
Но Господ ми даде едно видение за небесното светилиште. Се отвори Божјиот храм на небото и јас го видов Божјиот ковчег засолнет со престолот на милоста. Двајца ангели стојат, едниот од едната, а другиот од другата страна на ковчегот, крилата им се раширени над престолот на милоста, а лицата свртени кон него. Со тоа, ми кажа ангелот што ме придружуваше, е прикажан ставот на сите небесни суштества кои со длабока стравопочит гледаат на Божјиот свет закон, напишан со Неговиот прст.
Христос го подигна капакот на ковчегот и јас ги видов камените плочи на кои се напишани Десетте Заповеди. Се восхитив кога видов дека четвртата заповед се наоѓа во самиот центар на овие десет прописи, опкружена со ореол на блага светлина. Ангелот кажа: „Таа е единствена од десетте заповеди во која јасно е истакната дефиницијата за живиот Бог како Творец на небото и земјата и сѐ што е во нив.“
Кога се поставувани темелите на земјата, поставени се, исто така, и темелите на саботата. Покажано ми е дека никогаш не би постоеле неверници и атеисти кога вистинската сабота би била постојано празнувана. Почитувањето на саботата би го сочувала светот од идолопоклонство.
Четвртата заповед долго време била газена, затоа сме повикани, залагајќи се за погазената сабота, да ги заѕидаме дупките направени во Божјиот закон. Човекот на беззаконието кој се воздигнува над Бога, настојувајќи да го промени законот и времињата, ја променил саботата како ден за одмор и наместо седмиот ден, за ден за одмор го прогласил првиот ден на седмицата. Со таа постапка тој направил „урнатина“ во Божјиот закон. Пред да дојде големиот Господов ден, на жителите на светот треба да им се упати повик да се вратат на првобитната верност на Божјиот закон, кој антихристот го згазил со своите нозе. Вниманието на народот мора со поука и пример да се насочи на тие „урнатини“ во Божјиот закон.
Покажано ми е дека третиот ангел го претставува народот кој, објавувајќи ги „Божјите заповеди и верата Исусова“, ја прифаќа оваа порака, повикувајќи ги луѓето да ги чуваат Божјите заповеди како зеницата на своето око, и дека одѕивајќи се на тој повик, многу луѓе ќе ја прифатат Господовата сабота. (Life Sketches of Ellen G. White, 95.96)
