„Проповедај го словото, настојувај во време и во невреме, изобличувај, прекорувај, охрабрувај со сета трпеливост и со поука.“ (2. Тимотеј 4,2)
Вам ви се дадени бескрајни можности. Човекот, како што кажува Божјото слово, е Божји син. „Возљубени, сега сме Божји деца, и уште не се откри што ќе бидеме… И секој кој ја има оваа надеж во Него, се очистува самиот, како што е и Тој чист.“ (1. Јованово 3,2.3) Ваша предност е да се оттргнете од сѐ што е лекомислено, да се издигнете на повисок духовен степен за да ве почитуваат луѓето и за Бог да ве сака.
Со тоа што на младите, како и на луѓето од секоја возраст, им доделил духовна работа, Господ покажува колку ги цени своите деца. Тој ги повикува да владеат со себе. Тој ги повикува да бидат соработници во големото дело на спасување и подигање. Како што таткото го учи својот син во своите работи, така Господ ги учи своите деца во своето дело. Ние стануваме Божји соработници. Исус рекол: „Како што Ти Ме испрати Мене во светот, така и Јас ги испратив во светот.“ Зарем не сакаш повеќе да бидеш Божје дете отколку слуга на сатаната и слуга на гревот, вброен помеѓу Христовите непријатели?
На младите момчиња и девојки им е потребна Христовата милост во поголема мера, за да може во нивниот секојдневен живот да се откријат христијански начела. Ние се подготвуваме за Христовото доаѓање ако, со Негова помош, развиваме највисоки доблести. Секое младо момче и девојка имаат можност да изградат карактер со една прекрасна структура. Но за такво нешто е неопходно потребно да бидат тесно поврзани со Исуса. Единствено Тој е наша сила и наш успех. Во ниту еден миг не смееме да се потпреме на себе…
Какви и да се вашите таленти, колку и да ги имате, сетете се дека вие сте само управители на даровите. Бог ве става на проба, ви дава можност да ја покажете својата верност. Нему му ги должите сите свои способности. Нему му припаѓаат вашите, физички, умни и морални сили, и за Него треба да ги употребите. Вие ќе морате да дадете сметка пред Оној кој ви дал сѐ: време, влијание, способности, вештини. Овие дарови можеме најдобро да ги употребиме ако сериозно се трудиме да го извршиме големиот Божји план со цел подигање на човештвото.
Ако истраете во отпочнатото дело, ќе одите од победа во победа. Образувајте се со одредена цел. Имајте го на ум ова возвишено мерило за да можете да направите што е можно повеќе добра одблеснувајќи ја Божјата слава. (Порака до младите, стр. 47.48. оригинал)
