„Јас се молам за нив; не се молам за светот, туку за оние, кои Ми ги даде, зашто се Твои.“ (Јован 17,9)
Единствена заштита против злото е Христос да живее во срцето преку верата во Неговата правда. Искушението има моќ над нас токму затоа што себичноста сѐ уште постои во нашето срце. Но, кога ќе ја согледаме големата Божја љубов, себичноста ни изгледа толку одвратна и омразена, така што во нас се јавува желба да ја исфрлиме од својата душа. Додека Светиот Дух го воздигнува Христа, нашето срце омекнува и станува покорно, искушението ја губи својата моќ, а Христовата милост го преобразува карактерот.
Христос никогаш нема да ја напушти душата за која умрел. Човекот може да го остави Него и да му подлегне на искушението, но Христос никогаш нема да се сврти од оној кој го откупил со сопствениот живот. Кога нашиот духовен вид би бил поизострен, би ги виделе душите наведнати под товарот на маките, скршени од тага, оптоварени како кола полна со снопови, блиску до смртта поради обесхрабрувањето. Би ги виделе ангелите како брзо летаат во помош на оние кои се наоѓаат во искушение и стојат на самиот раб на пропаста. Небесните ангели ги потиснуваат војските на злото кои ги опкружуваат овие души и им помагаат нивните стапала да ги стават на сигурен темел. Битките кои се водат помеѓу овие две војски се исто така вистински како и оние што се водат меѓу војските на овој свет, и од исходот на овој духовен судир зависи вечната судбина на мнозина.
И на нас се однесуваат зборовите упатени на Петар: „Ете, сатаната посака да ве сее како пченица; но Јас се молев за тебе за да не се изгуби твојата вера“ (Лука 22,31.32). Да му благодариме на Бога што не сме оставени сами. Оној кој „толку го засака светот, што го даде својот Единороден Син, за секој што верува во Него да не загине, туку да има живот вечен“ (Јован 3,16), нема да нѐ напушти во борбата со непријателот на Бога и луѓето. „Еве, ви давам власт“,кажува Тој, „да газите на змии и скорпии, и власт над секоја непријателска сила; и ништо нема да ви наштети“ (Лука 10,19).
Живејте во заедница со живиот Христос и Тој цврсто ќе ја држи вашата рака и никогаш нема да ја испушти. Запознајте ја љубовта која Бог ја има кон нас, верувајте во неа и ќе бидете сигурни; таа љубов е тврдина, која е неосвоива за сите сатански напади и измами. (Мисли од гората на баженствата, стр. 118.119. оригинал)
