„А кога ќе дојде Тој, Духот на Вистината, ќе ве упати во сета вистина, зашто нема да зборува Сам од Себе, а ќе зборува она што слуша, и ќе ви навести за нештата што ќе дојдат.“ (Јован 16,13)
Улогата на Светиот Дух јасно е одредена со Христовите зборови: „А кога ќе дојде Тој, ќе го увери светот за гревот, за праведноста и за судот“ (Јован 16,8). Светиот Дух ги обвинува и ги осведочува душите за гревот. Ако грешникот му се потчини на животворното дејство на Духот, тој ќе се покае и ќе ја запознае важноста на послушноста кон божествените барања.
На грешникот кој се кае, кој е гладен и жеден за праведност, Светиот Дух му го открива Божјето Јагне кое ги зема на себе гревовите на светот. „Зашто ќе земе од моето и ќе ви го објави вам“, кажал Христос. „Ќе ве научи на сѐ и ќе ве потсети на сѐ што ви реков“ (Јован 16,14; 14,26).
Духот е даден како сила за обновување и повторно раѓање со цел спасението стекнато со смртта на нашиот Откупител да го стори делотворно. Духот постојано настојува вниманието на луѓето да го насочи кон големата жртва принесена на крстот на Голгота, на светот да му ја открие Божјата љубов, а на осведочената и обратена душа убавината и драгоценоста на Светите списи.
Доведувајќи ја душата во ситуација да ја увиди и да ја сфати својата грешност, и предочувајќи му го на умот мерилото на правдата, Духот ја одвраќа нашата љубов од земното и нѐ исполнува со копнеж за светост. „Ќе ве упати на секоја вистина“ (Јован 16,13), рекол Спасителот. Ако луѓето сакаат да се потчинат на Неговата сила, Духот ќе изврши посветување на целото суштество. Во душата на човекот Духот ќе го втисне божественото. Со Неговата сила патот на животот ќе стане толку јасен, што никој не мора да заталка.
Уште од почеток Бог со својот Свети Дух дејствувал преку луѓето за да ја оствари својата намера во врска со паднатиот човечки род… Духот на Семоќниот ги поттикнува човечките срца и сите што ќе го прифатат Неговото дејствување стануваат сведоци за Бога и за Неговата вистина. Во многу места можат да се видат тие посветени мажи и жени како и врз другите ја пренесуваат светлината што ним им го осветлила патот на спасението преку Исуса Христа. И додека настојуваат да им светат на другите, слично на оние кои биле крстени со Духот на денот Педесетница, примаат сѐ поголема сила од Светиот Дух. Така сета земја ќе биде осветлена со Божјата слава. (Делата на апостолите, стр. 52-54. оригинал)
