„Зашто, каква полза ќе има човек ако го придобие целиот свет, а на својата душа и напакости? Или што ќе даде човек во замена за својата душа?“ (Матеј 16,26)
Бог сака младите да станат луѓе со сериозни намери, готови за работа и способни да носат одговорности во Неговото големо дело. Бог бара млади со нерасипани срца, силни и храбри, спремни да се борат машки, да Го прослават Бога и да направат нешто добро за човештвото. Кога младите би сакале да ја проучуваат Библијата, да ги совладуваат своите нескротени желби, да го слушаат гласот на својот Творец и Спасител, не само што би живееле во мир со Господа туку би станале многу поблагородни и подобри. Твоето вечно добро, мој драг пријателу, зависи од вниманието што ќе им го посветиш на поуките во Божјото слово, кои за тебе се од непроценлива важност.
Ве замолувам да бидете мудри. Размислувајте за последиците од нескротливиот живот кој не е воден од Светиот Дух. „Не лажете се: Бог не дозволува да биде изигран! Зашто што човекот ќе посее, тоа и ќе жнее: кој сее во своето тело, од телото ќе пожнее погибел.“ (Галатјаните 6,7.8). Од љубов кон себе, од љубов кон Христа кој Себеси се жртвуваше за да ве спаси од пропаста, застанете за момент на прагот на животот и размислете за своите предности, одговорности и можности. Бог ви дава можност да постигнете висок идеал. Вашето влијание може да зборува во прилог на божествената вистина; можете да станете Божји соработници во големото дело за спасување на човештвото.
О, кога младите би можеле да ја проценат возвишената цел за која се повикани! Внимавајте на секој свој чекор. Зафатете се за секоја работа со благородни и посветени намери. Бидете одлучни и со Божја милост трудете се да не свртите од вистинската патека. Ако појдете по крив пат, на секој чекор ќе ви се закануваат опасности и погибел; и сѐ повеќе ќе се оддалечувате од патот на вистината, сигурноста и успехот. Потребно е да го зајакнете својот ум и со божествена моќ да ги оживеете своите морални сили.
На Божјото дело му се потребни највисоки човечки способности. Во различни гранки на делото се чувствува потреба за способни и образовани луѓе. Потребни се луѓе на кои би можело да им се довери работа во големите полиња кои се веќе зрели за жетва. Младите кои се со обични способности, потполно посветени на Господа, неопоганети со порок и нечистотија, ќе бидат успешни и оспособени да направат големи дела за Господа. (Порака до младите, стр. 21.22. оригинал)
