„Кој ќе најде добродетелна жена? Таа вреди повеќе од бисери.“ (Пословици 31,10)
Младите христијани треба да обратат големо внимание при склопувањето на пријателствата и изборот на пријатели. Она што сега ви изгледа како чисто злато, внимавајте да не се претвори во обичен метал. Световните пријатели се склони да ја попречуваат вашата служба на Бога, а многу души пропаднале поради несреќните врски, било работни или брачни, со оние кои никогаш не можат да се издигнат или облагородат.
Испитајте го секое чувство и следете го развојот на карактерот на личноста со која мислите да ја делите својата животна судбина. Чекорот којшто сакате да го направите е еден од најважните во вашиот живот, и затоа не треба да брзате. Ако сакате, не сакајте слепо. Внимателно испитајте дали вашиот брачен живот ќе биде среќен или нехармоничен и несреќен. Запрашајте се: Дали оваа врска ќе ми помогне да се приближам до небото? Дали ќе ја зголеми мојата љубов кон Бога? Дали ќе ме направи покорисен во овој живот? Ако на овие прашања можеш потврдно да одговориш, тогаш во Божји страв тргни напред.
Повеќето мажи и жени така склопувале брак, како да им било важно да одговорат само на едно прашање: дали се сакаме? Меѓутоа, тие треба да сфатат дека во брачната заедница има поголеми одговорности од овие. Тие мораат да одмерат дали нивното потомство ќе располага со здравје и интелектуална и морална сила. За жал, мал е бројот на оние кои дозволиле да ги поведат благородни побуди и возвишени цели, коишто не можеле лесно да ги отфрлат – одговорноста кон општеството и позитивното или негативното влијание на своите семејства.
Изборот на животниот партнер треба да биде таков што ќе им обезбеди телесна, интелектуална и духовна благосостојба и на родителите и на нивните деца – па така, и едните и другите ќе им бидат на благослов на своите ближни и ќе го прослават својот Создател.
Момчето за животен сопатник треба да бира девојка која е подготвена да го понесе својот дел од животниот товар, девојка чиешто влијание ќе го облагороди и издигне и со својата љубов ќе го направи среќен. (Темели на среќниот дом, стр. 44-46. оригинал)
