„Каде беше кога ја основав земјата, кажувај, ако знаеш!“ (Јов 38,4)
Бидејќи книгата на природата и книгата на откровението носат печат на истиот врвен Ум, нивните гласови мора да се согласуваат. Иако со различни методи и на различни јазици, тие сведочат за истите големи вистини. Науката постојано открива нови чудеса; но резултатите од нејзините истражувања не откриваат ништо што, правилно протолкувано, би се спротивставило на божественото откровение. Книгата на природата и пишаната Реч заемно се осветлуваат. Тие нѐ запознаваат со Бога учејќи нѐ за законите преку кои Тој дејствува.
Погрешните заклучоци, донесени врз основа на фактите набљудувани во природата, довеле до привиден судир меѓу науката и откровението; во настојување да се поврати загубената хармонија, прифатени се толкувања на Писмото кои ја поткопуваат и разурнуваат силата на Божјата Реч. Се сметало дека геологијата му се спротивставува на буквалното толкување на извештајот на Мојсеј за создавањето. Се тврдело дека биле потребни милиони години за еволуција на Земјата од некаков хаос; а заради прилагодување на Библијата кон тоа наводно научно откритие, создадена е претпоставка дека деновите на создавањето претставуваат долги неодредени периоди, кои траат илјадници, па дури и милиони години.
Таквиот заклучок е крајно неоснован. Библискиот извештај не си противречи ниту самиот на себе, ниту на учењето на природата. За првиот ден употребен за делото на создавањето извештајот вели: „И бидна вечер, па утро – прв ден“ (Битие 1,5). Суштински гледано, истото ова е кажано за секој од шесте дена од седмицата на создавањето. Вдахновената Реч изјавува дека секој од овие периоди бил ден кој се состоел од вечер и утро, како и сите други денови од тоа време па до денес. За самото дело на создавањето, божественото сведоштво гласи: „Зашто Тој рече – и сѐ стана, нареди – и сѐ се утврди“ (Псалм 33,9). Колку време за еволуција на Земјата од хаосот му било потребно на Оној кој на ваков начин можел да создаде безбројни светови? Мораме ли да вршиме насилство над неговата Реч за да ги објасниме Неговите дела?
Единствено со помош на тој Дух кој во почетокот „се движеше над водите“, таа Реч со која „сѐ е создадено што е создаено“, тоа вистинско Видело „кое го осветлува секој човек кој доаѓа на светот“, може правилно да се протолкува сведоштвото на науката. (Воспитување, стр. 128.129.134. оригинал)
